Türkmenistanyň Telekommunikasiýalar we informatika instituty «EA çözgütleri» atly milli talyp hakaton bäsleşiginiň netijelerini jemläp, ýeňijileri yglan etdi. Bäsleşik 21-nji fewralda institutyň garamagyndaky «Sanly Çözgüt – IT meýdança» hojalyk jemgyýetiniň binasynda geçirildi. Oňa ýurduň ähli ýokary okuw mekdeplerinden 16 talyp topary gatnaşdy — diýip, «Türkmenistan: Altyn asyr» neşiri habar berýär. I orna Türkmenistanyň Inžener-tehniki we ulag kommunikasiýalary instituty, Içeri işler ministrliginiň instituty hem-de Ýagşygeldi Kakaýew adyndaky Halkara nebit we gaz uniwersitetiniň toparlary mynasyp boldular. II orna Halkara ynsanperwer ylymlary we ösüş uniwersitetiniň, Türkmenistanyň Döwlet binagärlik-gurluşyk institutynyň hem-de Magtymguly adyndaky Türkmen döwlet uniwersitetiniň toparlary eýe boldular. III orna Türkmen döwlet ykdysadyýet we dolandyryş institutynyň, S.A. Nyýazow adyndaky Türkmen oba hojalyk uniwersitetiniň, Döwletmämmet Azady adyndaky Türkmen milli dünýä dilleri institutynyň hem-de Türkmenistanyň Döwlet energetika institutynyň toparlaryna berildi. Ýeňijilere diplomlar we ýadygärlik sowgatlary gowşuryldy. Şeýle hem ýurduň beýleki ýokary okuw mekdeplerinden gatnaşan 6 topar höweslendiriş baýraklaryna mynasyp boldy. Hakatona gatnaşyjylar emeli aň tehnologiýalaryny ulanmak arkaly IT önümlerini işläp taýýarlamakda bäsleşdiler. Esasy ugur ulanyjynyň derejesine görä soraglary emele getirip bilýän we jogaplara esaslanyp netijeleri seljerýän test ulgamlaryny döretmekdi. Ýeňijileriň innowasion çözgütleriniň netijeliligi we işjeňlik görkezijileri ýokary okuw mekdepleriniň IT dersleriniň mugallymlaryndan hem-de bu ugurda çagyrylan hünärmenlerden düzülen eminler topary tarapyndan seljerildi.

Türkmenistanyň Döwlet sirki Azerbaýjanyň paýtagtynda uly göwrümli sirk maksatnamasyny hödürlär. Çykyşlar «Circus Sea Breeze» arenasynyň meýdançasynda geçiriler. Maksatnamanyň esasy bölegi 2025-nji ýylda Monte-Karloda geçirilen 47-nji halkara sirk festiwalyň ýeňijisi bolan «Galkynyş» milli at üstündäki oýunlar toparynyň çykyşy bolar. Maksatnamada sirk sungatynyň beýleki dürli žanrlarynyň artistleriniň çykyşlaryna hem giň orun berler. Nowruz baýramy mynasybetli guramaçylar ýörite bahalary yglan etdiler: 14-nji, 15-nji we 20-nji martda ähli seanslar üçin petekleri 15 azerbaýjan manadyndan satyn almak mümkin. Tomaşaçylara ýeňillik döretmek maksady bilen, «Koroğlu» metro stansiýasyndan ýörite awtobus gatnawlary ýola goýlar. Petekler iTicket.az saýtynda we şäheriň ähli kassalarynda satuwa çykaryldy.

Türkmenistanyň sebitlerine döredijilik saparyny amala aşyrýan «Galkynyş» milli at üstündäki oýunlar topary Lebap welaýatynda boldy. 23-nji fewralda Türkmenabatdaky «Türkmeniň ak öýüne» ýygnanan 3 müň adam toparyň täsin çykyşlaryna tomaşa etdi. Bu barada «Türkmenistan» gazetinde habar berildi. Habarda bellenilişi ýaly, dabarada topar Lebap welaýat Taryhy we ülkäni öwreniş muzeýinde boldular. Muzeýiň gaznasynda diňe bedewler bilen bagly gymmatlyklaryň 200-den gowragy bar. Olaryň aglabasy asyrlaryň jümmüşinden habar berýär. Welaýat muzeýine gezelenç şöhratly toparyň agzalary üçin gündogar sebite döredijilik saparynyň iň täsirli, ýatda galyjy pursatlarynyň birine öwrüldi. Az salymdan toparyň agzalary Türkmenabadyň Bitarap Türkmenistan köçesiniň ugry boýunça ýöriş etdiler. Ýoluň ugrunda şäherdäki ýöriteleşdirilen 39-njy orta mekdebiň, Seýitnazar Seýdi adyndaky döwlet sazly drama teatrynyň we welaýat kitaphanasynyň öňünde aýdym-sazly dabaralar ýaýbaňlandyryldy. Ak gümmezli «Türkmeniň ak öýi» binasy şöhratly topary aýdym-sazly garşylady. Dabaralar binanyň öňündäki meýdançadan başlap, girelgede dowam etdi. Bu ýerde guralan sergide welaýatyň suratkeşleridir heýkeltaraşlarynyň türkmen bedewlerine bagyşlan eserlerine orun berlipdir. Az salymdan binanyň esasy zalynda dabara başlandy. Dabara gelenleriň ör turup el çarpyşmasy astynda toparyň agzalary sahna täze berlen halkara şahadatnamalary alyp çykdylar. Soňra toparyň çykyşlary boldy. Ozal habar berşimiz ýaly, 2026-njy ýylyň ýanwarynda Monako Knýazlygynyň Monte-Karlo şäherinde 48-nji halkara sirk sungaty festiwaly geçirilip, onuň çäklerinde «Galkynyş» milli at üstündäki oýunlar toparyna sirk sungatyna uly goşandy üçin Bütindünýä sirk federasiýasy hem-de Ýewropa Sirk assosiasiýasy tarapyndan halkara şahadatnamalar gowşuryldy. Bu wakanyň hormatyna Arkadag şäherinde, Aşgabatda dabaraly çäreler ýaýbaňlandyryldy. Indi bolsa toparyň agzalary ýurduň welaýatlarynda bolup, bu üstünligiň şanyna guralýan çärelere gatnaşýarlar we at üstünde ýerine ýetirýän täsin oýunlary bilen çykyş edýärler.